الثانوية العامة اخرتها البلكونة!!!!!!!!

أثناء امتحانات الثانوية العامة

الأم تلتهم أصابعها من القلق وهي تنظر إلى الساعة المعلّقة على الحائط قبل أن تلكز زوجها في عنف، وهي تقول له في عصبية:
يا راجل قوم اتلحلح.. إنت قاعد هنا ومبسوط قوي وكأنك "حسن شحاتة" لما فاز بالبطولة الإفريقية، والواد اتأخر عن ميعاده نص ساعة.. قوم فز!

يضع الأب الجريدة إلى جواره قبل أن يقوم من مكانه مفزوعا وهو يقول:
يا ستي إيه اللي حصل يعني لما الواد اتأخر شوية؟.. مش جايز مش عاوز يرجع البيت عشان ماتعمليلوش فيها رئيس سجن أبو غريب، وتنزلي معاه في تحقيق وتعذيب، وكأن الواد كان شغال مع "صدام" مش راجع من امتحان!

تضرب الأم بكف يدها على المنضدة وهي تصيح:
انزل شووووووووووووووفه!

يصبح الأب في ثانية واحدة عند باب الشقة الذي يفتحه وهم يهمهم:
"حسبنا الله ونعم الوكيل"

يفاجأ بولده يدخل عليهم الشقة وهو في حالة صمت ووجوم بالغَيْن.. يدخل إلى المنزل وكأنه قادم من تشييع جنازة صديق مقرب له.. تقترب منه الأم في خوف، ثم تربت على كتفه وهي تسأله في جزع:
"مالك يابني؟.. إيه اللي حصل؟.. اوع تزعّل نفسك.. حليت وحش في الامتحان.. تغور الثانوية العامة.. ولا يهمك"..
يتركها الابن في هدوء.. ثم يتجه بخطوات متسارعة إلى الشرفة.. ليفتحها في سرعة قبل أن يعتلي السور وسط صراخ والدته ووالده و.....



****

خبر في جريدة:
انتحار طالب بسبب صعوبة امتحانات الثانوية العامة!!!

****


يوم إعلان نتيجة الثانوية العامة

الأم تلتهم أصابعها من القلق وهي تنظر إلى الساعة المعلّقة على الحائط قبل أن تلكز زوجها في عنف، وهي تقول له في عصبية:
يا راجل قوم اتلحلح.. أنت قاعد هنا ومبسوط قوي وناقص تجيب ربابة وتغني.. والواد اتأخر عن ميعاده نص ساعة.. والزغاريد بترن في كل حتة في الشارع.

يضع الأب الجريدة إلى جواره قبل أن يقوم من مكانه مفزوعا وهو يقول:
يا ست إيه اللي حصل يعني لما الواد اتأخر شوية؟.. ما تلاقيه فرحان ومزقطط مع زمايله.. شوية وهتلاقيه داخل عليك بإزازة بيبسي ومعاها 3 شاليموه كمان.. اهدي بس اهدي!

يتناهى إلى أسماعهما صوت صراخ وزغاريد، فتتوتر الأم أكثر، فتجذب الأب من مجلسه وهي تقول له:
شاليموه! بأقولك قوم دور عليه دلوقتي وإلا أنا اللي هأعملَك عصير وهأشرَبك من غير شاليموه فعلا!

ينتفض الأب من كرسيه، ثم يتحرك نحو الباب وهو يبرطم، وقبل أن يمسك الأكره يجد الابن يدخل عليهم وعلى فمه نصف ابتسامة، فينظر الأب إلى الأم وهو يقول:
شفتي؟.. أهو جه وجايب البيبسي كمان معاه.. بس فين الشاليموه يا حبيبي؟!

يضع الابن زجاجة البيبسي على المنضدة وإلى جوارها ورقة بها درجاته المتوسطة.. قبل أن يتجه إلى البلكونة وهو يردد:
جبت 56%.. مش عارف أدخل بيهم حمام بلدي دول ولا إيه؟!.. أنا مخنوق.. مخنوق.. مخنووووووووووووووق!



****

خبر في جريدة:
انتحار طالب بسبب حصوله على مجموع ضعيف في الثانوية العامة!!!

****

زي ما أنت شايف..
الانتحار بالنسبة لطلاب الثانوية العامة أصبح تقريبا "عادة يومية"!

واحد يطلع من الامتحان وهو ما حلش كويس..
ينتحر!

واحد جاب مجموع قليل..
ينتحر!

مش بعيد واحد يصحى من النوم ينتحر على اعتبار إن الانتحار ده بقى مادة أساسية في منهج الثانوية العامة!



كل ده رغم إن الثانوية العامة دي حضرتك مرحلة في حياة البني آدم..
طب والله مرحلة..
ومين خلق السماوات والأرض مرحلة..

يعني عادي جدًّا إن الواحد يدخلها وينجح أو يسقط أو يجيب مجموع نص نص..
هيكمل أكيد حياته بعدها..

وأكبر دليل على كده إن فيه كتير من اللي بيجيبوا مجاميع كبيرة في الثانوية العامة بيفشلوا في الجامعة وفي حياتهم العملية..
وبالعكس....

يعني الثانوية العامة خطوة واحدة بس في مشوار الواحد..
خطوة ممكن تزقه لقدام صحيح بس ممكن بعد كده -على حسب شخصيته واجتهاده- يرجع على حِسّها عشرات الخطوات للخلف..

وخطوة ممكن ترجعه لورا كام خطوة شوية بس بعد فترة ممكن يجمع شتات نفسه ويكون أحسن.. أحسن بكتير..

لاحظ إن الكلام ده تقريبا مش بيحصل إلا في مصر
عمرك سمعت عن طالب انتحر في أمريكا عشان جاب 50%!


تفتكر السبب في ده إيه؟
ليه المصريين بيتعاملوا مع الثانوية العامة
وكأنها اللحظة الأخيرة قبل القيامة؟..
مفيش بعدها يا إما جنة يا إما نار؟!!

وإزاي ممكن نعالج الحالة دي؟




يا ريت تكتبوا وتقولوا لنا رأيكم
بس رجاءً بعيد عن البلكونة إياها!.....



برنسس

والله حسب العليل والتحليل العلمى والتجريبى من قبل الدكتوره بكيزه
فى اسباب كتير بتخلى الطلاب ينتحر
منها اللى استاذه برينسس قالتها
مشكوره كتير على كلامك
ياجماعه دلوقتى اللى بينتحر دا بيبقى فاهم ان الدنيا هاتقف لو ماجبش مجموع يدخله كليه عدله او حتى معهد
بس فالواقع الحياه ابسط من كدا
ومرحله الثانويه العامه من مراحل الحياه
ودى سنه الحياه
الانسان ياما يعيش ويشوف
وياما حكالنا مستر حمدى عن حالات الانحار اللى بتحصل
بس ليه كل واحد
يحل باد فالامتحان كذا
او يجيب مجموع وحش
او حتى متوسط
يرمى نفسه من البلكونه المعهوده
ويتخيل ان الدنيا وقفت
وجواب التعين او الترشيح الوظيفى اللى يبقولوا عليه
مش هايجى
ياناس انشالله يشتغل ساعى
هى دى الدنيا ممكن يكون الواحد فى منصب عالى جدا
بس شغلته مو شريفه
على عكس غيره ممكن يكون شغال شغلانه مش اد كدا
بس شريفه
زفى نهايه ما تم ايضاحه
وما سوف يحدث عندما يرى بتوع الثانويه العامه الكلام دا
شكرا كتير برينسس على موضوك الحلو
اللى فعلا يستحق النقاش
كان معكم من امام الجهاز
د/بكيزه ام جعمز
ههههههههه

موضوع جميل جدا بس انا عندى تعليق صغير الثانويه العامه مش مرحله وخلاص دى اهم مرحله اللى بتحدد الواحد هيمشى فى اى طريق
والطالب اللى جاب 50% ده ما انتحرش علشان المجموع لانه اصلا مش فى دماغه ده انتحر علشان عنده يئس من رحمه الله
معلش كترت عليكم بس ده رايى

أولا ميرسي يا قمر على الموضوع ده
ثانيا تسمحيلي اقولك انك واخده الموضوع ببساااطه اوووووي انتي والدكتوورة بكيزة أم جعمز
انا فعلا كنت بقووول زيكم كده بس قبل ما أدخل الثانوويه لكن بعد مادخلتها فكرتي كلها اتغيريت
مجرد ان انتي تكووني في ثانويه عامه ده وحده كفااايه علشان تعيشي التوتر على أصوله وكل شوويه يجيلك حالة إغماء من قلة النوم ودحك في الكتاب
( بدون احباط)
بس طبعااا الحاجات دي مش هتووصل لدرجة الانتحار مهما كان اانا مش هخسر دنيتي وأخرتي
وانا من رايي ان الحالة الاقتصاديه العظيمة اللي بتعيشها مصر سبب من الاسباب علشان الشاب عارف هيتخرج من كليته على حاجه من الاتنين يا إما القهوه وده باختيار الأغلبية أو في الشوارع ويرخموا على اللي رايح واللي جااي

عندك حق يا برنسس بس بردو الواحد في لحظة بيتشل عن التفكير في اي حاجه ويكون همه الوحيد انو يخلص من حياااته يعني هوا مش ساعتها هيفكر اذا كان حرام ولا لاء

((على فكرة البلكونة دى انا روحتها كتير لما برفض اعمل شاى ومش عارفه اوصف احساسى وانا على السور ومتهيقلى فى ناس انا حكتلهم))

وعلى حكاية البلكووونه دي بدخلها لما يكون عندي غسيل المواعين

من تجربه سابقه فى الثانويه العامه بصم اللى بيخلى الثانويه العامه صعبه هم الاهل والاستاذه اللى بيوترونا قبل ما نعرف ايه هو المنهج اصلا بيعقدونا وبيخلونا نحس انها اخر العالم لو منجحناش وجبنا مجاميع عاليه يبقى احسن لينا نتنحر وده طبعا غلط الثانويه بجد بسيطه اوى

والله كلامكم كله جامد

انا فاهمة قصدك والله يا سارة
احنا بشر
وميرسى ليكى يا نورا على كلامك ده وتخفيفك عننا

وعلى فكرة انا مش عارفه اذا كنتى تعرفينى ولا لا
بس انا لايكى جيرل حكتلى عنك